Pravasi Varthakal

ദോഹ: ഖത്തറിൽ സ്വന്തമായൊരു പുതിയ വീട്​ സ്വന്തമാക്കി ബോളിവുഡ്​ താരം സൈഫ്​ അലി ഖാൻ. മുംബൈയിലെ വീട്ടിൽ വെച്ച്​ അക്രമിയുടെ കുത്തേറ്റ്​ പരി​ക്കു പറ്റിയതിനു പിന്നാലെയാണ്​ സുരക്ഷ കൂടി കണക്കിലെടുത്ത്​ താരം ഖത്തറിൽ ആഢംബര വീട്​ സ്വന്തമാക്കിയത്​. ഖത്തറിലെ ആഢംബര മേഖലയായ പേൾ ഖത്തറിലെ മർസ അറേബ്യ ഐലൻഡിൽ ദി സെൻറ്​ റേജിസിലാണ്​ സൂപ്പർ താരം പുതിയ വീട്​ വാങ്ങിയത്​. പ്രമുഖ ബിസിനസ്​, റിയൽ എസ്​റ്റേറ്റ്​ ​ഗ്രൂപ്പായ അൽ ഫർദാൻ മുംബൈയിൽ നടത്തിയ വാർത്താ സമ്മേളനത്തിലാണ്​ ബോളിവുഡ്​ താരത്തിൻെറ പുതിയ വീട്​ സംബന്ധിച്ച്​ പ്രഖ്യാപനമുണ്ടായത്​. ഖത്തറിലെ സുരക്ഷയും, ഭംഗിയും പ്രശംസിച്ച അദ്ദേഹം ഇന്ത്യയുമായുള്ള അടുപ്പവും പരിഗണിച്ചാണ്​ കുടുംബത്തിന്​ സുരക്ഷിതമായൊരു രണ്ടാം വീട്​ അറബ്​ രാജ്യത്ത്​ സ്വന്തമാക്കാൻ തീരുമാനിച്ചതെന്ന്​ വെളിപ്പെടുത്തി. സുരക്ഷയോടൊപ്പം വീട്ടിൽ നിന്ന് അകലെയുള്ള തൻെറ രണ്ടാം വീടാണിതെന്നും അദ്ദേഹം പറഞ്ഞു. ഈ വർഷം ജനുവരി 16ന്​ മുംബൈ ബാന്ദ്രയിലെ വസതിയിൽ വെച്ച്​ സൈഫ്​ അലി ഖാന്​ കുത്തേറ്റത്​ വലിയ വാർത്തയായിരുന്നു. അർധരാത്രിയിൽ വീട്ടിൽ അതിക്രമിച്ചു കയറിയ അക്രമിയുമായുള്ള ഏറ്റുമുട്ടലിൽ സൈഫിന്​ കഴുത്തിലും പുറത്തും കൈയിലുമായി ആഴത്തിൽ കുത്തേറ്റിരുന്നു. അഞ്ചു ദിവസത്തെ ആശുപത്രി വാസത്തിനു ശേഷമായിരുന്നു താരം വീട്ടിലേക്ക്​ മടങ്ങിയത്​.

ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ
https://chat.whatsapp.com/BsQQXAGm9mT0SOeedQwTJt