Pravasi Varthakal

ലോകം കണ്ട ഏറ്റവും മികച്ച വ്യവസായികളിൽ ഒരാളായ രത്തൻ ടാറ്റയുടെ മരണം ഏറെ ദുഖം നിറഞ്ഞതാണ്. യഥാർത്ഥ മനുഷ്യ സ്നേഹിയും സഹജീവികളോട് എങ്ങനെ പെരുമാറണമെന്നും കാണിച്ച് തന്ന അതുല്യ മനുഷ്യനായിരുന്നു അദ്ദേഹം. ആരെയും വേദനിപ്പിക്കാതെയാണ് 86 വർഷത്തോളം അദ്ദേഹം ജീവിച്ചത്. മറ്റുള്ളവരുടെ ഉള്ള അറിയാനും അവരുടെ വിഷമങ്ങളെ മനസിലാക്കാനും അദ്ദേഹത്തിന് സാധിച്ചിരുന്നു. ഇന്ത്യക്കാരുടെ ആവശ്യങ്ങൾക്ക് അനുസരിച്ചുള്ള വ്യാപാരങ്ങളിൽ ശ്രദ്ധ കേന്ദ്രീകരിക്കാൻ ഏറ്റവുമധികം ശ്രദ്ധിച്ചിരുന്നയാളാണ് അദ്ദേഹം.

കഴിഞ്ഞ കുറച്ച് കാലങ്ങളായി ആരോഗ്യസ്ഥിതി മോശമായതിനെ തുടർന്ന് രോഗാവസ്ഥയിലായിരുന്നു അദ്ദേഹം. രക്തസമ്മർദ്ദം കുറയുന്നതായിരുന്നു അദ്ദേഹം നേരിട്ടിരുന്ന പ്രധാന പ്രശ്നം. വിദഗ്ധ ഹൃദ്രോഗ ചികിത്സകരുടെ നിരീക്ഷണത്തിലായിരുന്നു രത്തൻ ടാറ്റ തുടർന്നിരുന്നത്. എന്നാൽ ബുധനാഴ്ച രാത്രിയോടെ നില വഷളാകുകയും മരിക്കുകയുമായിരുന്നു. പ്രായവും അദ്ദേഹത്തിൻ്റെ ആരോഗ്യ സ്ഥിതിയെ കൂടുതൽ വഷളാക്കിയിരുന്നു. ഹൈപ്പോ ടെൻഷൻ എന്ന അവസ്ഥയിലൂടെ ആയിരുന്നു അദ്ദേഹം കടന്ന് പോയികൊണ്ടിരിക്കുന്നത്. പ്രായമായ മിക്ക ആളുകളും നേരിടുന്ന ഒരു പ്രധാന പ്രശ്നമാണിത്. ഇത് മൂലമാണ് ശരീരത്തിലെ മിക്ക അവയവങ്ങളും തകരാറിലാകുന്നത്.

രക്തസമ്മർദ്ദം കുറയുന്നത് എത്ര അപകടകരമാണ്?
ഒരു വ്യക്തിയുടെ രക്തസമ്മർദ്ദം 90/60-ൽ താഴെയാണെങ്കിൽ, അത് ലോ ബിപിയായിട്ടാണ് ഡോക്ടർമാർ കണക്കാക്കുന്നത്. പ്രായം കൂടുന്തോറും ബിപി കുറയാനും കൂടാനുമുള്ള സാധ്യത വളരെ കൂടുതലാണ്. കുറഞ്ഞ ബിപി കാരണം, പ്രായമായവരിൽ ഹൃദയത്തിലേക്കും തലച്ചോറിലേക്കും മറ്റ് അവയവങ്ങളിലേക്കും രക്തപ്രവാഹം കുറയാൻ തുടങ്ങുന്നത് വലിയ ആരോഗ്യ പ്രശ്നങ്ങൾക്ക് ഇടയാക്കും. ബിപി പെട്ടെന്ന് കുറയുമ്പോൾ തലച്ചോറിലേക്കുള്ള രക്തവും ഓക്സിജനും കുറയാൻ തുടങ്ങും. ഇത് പിന്നീട് തലകറക്കം, ചിലപ്പോൾ ബോധക്ഷയം പോലെയുള്ള പ്രശ്നങ്ങളിലേക്ക് നയിച്ചേക്കാം.

എന്തൊക്കെയാണ് ഇതിനുള്ള ചികിത്സകൾ?
കൃത്യമായ ഇടവേളകളിൽ രക്തസമ്മർദ്ദം പരിശോധിക്കേണ്ടത് വളരെ പ്രധാനമാണ്. ജീവിതശൈലിയിലും ഭക്ഷണശൈലിയിലും ശ്രദ്ധ നൽകുന്നത് ഒരു പരിധി വരെ ഇതിന് പിടിച്ചു നിറുത്താൻ സഹായിക്കും. ഉപ്പ് കഴിക്കുന്നത് വർദ്ധിപ്പിക്കാൻ ശ്രമിക്കുക, അതുപോലെ ധാരാളം ദ്രാവകങ്ങൾ കുടിക്കുക, മദ്യവും സിഗരറ്റും ഒഴിവാക്കുക. വൈറൽ അണുബാധ സമയത്ത്, ജലാംശം നിലനിർത്തേണ്ടത് വളരെ പ്രധാനമാണ്. നിർജ്ജലീകരണം ഒഴിവാക്കാൻ ഇത് സഹായിക്കും. ചിട്ടയായ വ്യായാമവും ജാഗ്രതയോടെയുള്ള ചലനങ്ങളും വളരെ നല്ലതാണ്. അതുപോലെ ദിവസവും സ്ട്രെച്ച് ചെയ്യാൻ മറക്കാതിരിക്കുക. കിടക്കയിൽ നിന്ന് എഴുന്നേൽക്കുമ്പോൾ ആരുടെയെങ്കിലും സഹായം തേടേണ്ടതും വളരെ പ്രധാനമാണ്. ഇത് കൂടതെ ശ്രദ്ധിക്കേണ്ട മറ്റ് ചില കാര്യങ്ങൾ കൂടിയുണ്ട്.

തല ഉയർത്തി വച്ച് വേണം എപ്പോഴും ഉറങ്ങാൻ
ദീർഘനേം നിൽക്കാനോ, ഭാരമുള്ള സാധനങ്ങൾ ഉയർത്താനോ പാടില്ല
ചെറിയ അളവിൽ പല സമയത്തായി ഭക്ഷണം കഴിക്കാൻ ശ്രദ്ധിക്കുക
അമിതമായി ചൂട് വെള്ളം ഉപയോഗിക്കരുത്
കാർബോഹൈഡ്രേറ്റ് കഴിക്കുന്നത് കുറയ്ക്കുക
ഭക്ഷണം കഴിച്ച ശേഷം വിശ്രമിക്കാൻ ശ്രമിക്കുക