Pravasi Varthakal

യുഎഇയിലെ റോഡുകളില്‍ വാഹനമോടിക്കുന്ന വ്യക്തിയാണോ നിങ്ങള്‍? എങ്കില്‍ യുഎഇ ദേശീയ കാലാവസ്ഥാ കേന്ദ്രത്തിന്‍റെ മുന്നറിയിപ്പ് അവഗണിക്കേണ്ട. അബുദാബി, ദുബായ്, ഷാർജ, അൽ ഐൻ എന്നിവിടങ്ങളിലെ ചില ഭാഗങ്ങളിൽ മൂടല്‍ മഞ്ഞുണ്ടാകുമെന്ന അലേർട്ട് പുറത്തുവിട്ടിരിക്കുകയാണ് കാലാവസ്ഥാ കേന്ദ്രം. ശനിയാഴ്ച്ച രാവിലെ 9 വരെയാണ് മൂടല്‍മഞ്ഞ് മുന്നറിയിപ്പ് പ്രഖ്യാപിച്ചിരുന്നത്. ഞായറാഴ്ച്ച രാവിലെയും സമാനമായ സാഹചര്യമുണ്ടാകുമെന്നാണ് കാലാവസ്ഥാ വിഭാഗം നല്‍കുന്ന സൂചന. വിവിധ പ്രദേശങ്ങളിൽ കനത്ത മൂടൽമഞ്ഞ് രൂപപ്പെടുന്നതിനാൽ ദൃശ്യപരത കുറയുകയും വാഹനമോടിക്കാൻ അപകടകരമായ സാഹചര്യം സൃഷ്ടിക്കപ്പെടുകയും ചെയ്യുന്നതിനാലാണ് മുന്നറിയിപ്പ്. ഷാർജയിലേക്കുള്ള ഷെയ്ഖ് മുഹമ്മദ് ബിൻ സായിദ് റോഡ്, അബുദാബിയിലെ അൽ വത്ബ, മദീനത്ത് സായിദിലേക്കുള്ള ഹാമിം റോഡ്, അൽ മക്തൂം അന്താരാഷ്ട്ര വിമാനത്താവളത്തിനും ദുബായ് സൗത്തിനും ചുറ്റുമുള്ള പ്രദേശങ്ങൾ തുടങ്ങിയ പ്രധാന റോഡുകളിൽ വാഹനമോടിക്കുന്നവർ ജാഗ്രത പാലിക്കണമെന്നാണ് എന്‍സിഎമ്മിന്‍റെ നിര്‍ദേശം. മൂടൽമഞ്ഞിന് പുറമേ, ശനിയാഴ്ച്ചയിലെ കാലാവസ്ഥ ഭാഗികമായി മേഘാവൃതമായിരിക്കുമെന്നും, രാജ്യത്തിന്റെ കിഴക്കൻ, വടക്കൻ ഭാഗങ്ങളിൽ മേഘങ്ങൾ പ്രത്യക്ഷപ്പെടുമെന്നും പ്രതീക്ഷിക്കുന്നുണ്ട്. ഉൾനാടൻ പ്രദേശങ്ങളിൽ 31°C മുതൽ 36°C വരെയും തീരദേശ പ്രദേശങ്ങളിലും ദ്വീപുകളിലും 28°C നും 32°C നും ഇടയിലും ഉയര്‍ന്ന താപനില ഉണ്ടാകുമെന്നാണ് പ്രവചനം. പർവതങ്ങളിൽ 25°C നും 29°C നും ഇടയിലുള്ള താപനിലയിയും നേരിയ തണുപ്പും അനുഭവപ്പെടുമെന്ന് കാലാവസ്ഥാ വിഭാഗം വ്യക്തമാക്കി. ശനിയാഴ്ച്ച രാത്രിയിലും ഞായറാഴ്ച രാവിലെ വരെയും കാലാവസ്ഥ ഈർപ്പമുള്ളതായി തുടരും.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/EvsyvV3gKrEHNC3r1sci6g