Pravasi Varthakal

ദോഹ ∙ ഹമദ് രാജ്യാന്തര വിമാനത്താവളം വഴി രാജ്യത്തേക്ക് കടത്താൻ ശ്രമിച്ച ലഹരിമരുന്ന് ഗുളികകൾ ഖത്തർ എയർപോർട്ട് കസ്റ്റംസ് അധികൃതർ പിടികൂടി. 1,932 ലിറിക്ക ഗുളികകളാണ് ഒരു യാത്രക്കാരനിൽ നിന്നും പിടികൂടിയത്. രഹസ്യ വിവരത്തെ തുടർന്ന് ഹമദ് രാജ്യാന്തര വിമാനത്താവളത്തിലെ കസ്റ്റംസ് ഉദ്യോഗസ്ഥർ നടത്തിയ പരിശോധനയിലാണ് യാത്രക്കാരൻ പിടിയിലാകുന്നത്.കസ്റ്റംസ് ഇൻസ്പെക്ടർ എക്സ്റേ മെഷീൻ ഉപയോഗിച്ച് യാത്രക്കാരന്‍റെ ബാഗ് സ്ക്രീൻ ചെയ്യുകയും സംശയം തോന്നിയതിനെ തുടർന്ന് പെട്ടി പൊട്ടിച്ചു പരിശോധിച്ചപ്പോഴാണ് ഗുളികകൾ കണ്ടെത്തിയത്. പിടിയിലായ പ്രതിയെ കൂടുതൽ നിയമ നടപടിക്കായി കസ്റ്റംസ് അധികൃതർ ബന്ധപ്പെട്ട അധികാരികൾക്ക് കൈമാറി. എന്നാൽ പിടിയിലായ യാത്രക്കാരൻ ഏത് രാജ്യക്കാരനാണെന്നത് അധികൃതർ വ്യക്തമാക്കിയിട്ടില്ല.ലഹരിമരുന്ന് കടത്തിനെതിരെ ശക്തമായ നടപടിയാണ് ഖത്തർ സ്വീകരിക്കുന്നത്. ഒളിപ്പിച്ചു കടത്താൻ ശ്രമിക്കുന്ന ലഹരിമരുന്നുകൾ കണ്ടെത്താൻ അത്യധുനിക സ്ക്രീനിങ് മെഷീനുകൾ ഉൾപ്പെടെ വിപുലമായ സൗകര്യങ്ങളാണ് ഹമദ് രാജ്യാന്തര വിമാനത്താവളത്തിലുള്ളത്. ലഹരിമരുന്ന് കടത്തിന്‍റെ പേരിൽ ഇന്ത്യക്കാർ ഉൾപ്പെടെ നിരവധി പേർ ഖത്തറിൽ ശിക്ഷ അനുഭവിക്കുന്നുണ്ട്.

ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ
https://chat.whatsapp.com/C7egAwSvOtY4DVc9SwYyfK